পখিলা খেদা শৈশৱত চাহ দোকানী, পিতৃয়ে দিনহাজিৰা কৰে, প্ৰশিক্ষণ অবিহনেই UPSC পাছ কৰি আইএএছ  হ’ল হিমাংশু, জানক হিমাংশুৰ চকু সেমেকাই তোলা সেই কাহিনী

পখিলা খেদা শৈশৱত চাহ দোকানী, পিতৃয়ে দিনহাজিৰা কৰে, প্ৰশিক্ষণ অবিহনেই UPSC পাছ কৰি আইএএছ  হ’ল হিমাংশু, জানক হিমাংশুৰ চকু সেমেকাই তোলা সেই কাহিনী

Facebook
Twitter
LinkedIn
Facebook
Twitter
LinkedIn

NB NEWS- সৰুৰে পৰাই অৰ্থৰ অভাৱ কি তেওঁ দেখিছে৷ দুবেলা দুমুঠি যোগান ধৰিব নোৱাৰি হতাশাই কোঙা কৰা পিতৃৰ মুখখনে তেওঁক কম বয়সকে কাম কৰিবলৈ বাধ্য কৰাইছিল৷ কেতিয়াবা যদি চাহ বিক্ৰি কৰিছিল কেতিয়াবা আকৌ টিউছন লৈছিল৷ হাজাৰ বাধা নেওচিও তেওঁ কিন্তু সপোন দেখিবলৈ এৰা নাছিল৷ দুচকুত ভৰ কৰি থকা সপোনবোৰ দিঠক হৈছে৷ দেশৰ আটাইতকৈ কঠিন পৰীক্ষাত উত্তীৰ্ণ হৈ তেওঁ এতিয়া আইএএছ অফিচাৰ৷ তেওঁ আইএএছ হিমাংশু গুপ্ত৷ উত্তৰাখণ্ডৰ উধমসিং জিলাৰ সিতাৰগঞ্জত জন্ম হিমাংশুৰ৷

পাছলৈ অৱশ্যে তেওঁ সিতাৰগঞ্জ এৰি উত্তৰপ্ৰদেশৰ বৰেলিলৈ যায়৷ অৰ্থৰ অভাৱে কাঢ়ি লৈছিল হিমাংশৰ পখিলা খেদা শৈশৱ৷ অভাৱৰ সৈতে খুব সুন্দৰভাৱে পৰিচিত হিমাংশু৷ পিতৃ পেছাত দিনহাজিৰা কৰা এজন সাধাৰণ মানুহ৷ পিতৃয়ে দিনহাজিৰা কৰা ধনেৰে ঘৰ নচলে যাৰবাবে শৈশৱতেই হিমাংশুৱে ৰাস্তাৰ কাষত খুলি লৈছিল এখন চাহ দোকান৷ সেই দোকানতেই পিতৃৰ সৈতে বহি চাহ বিক্ৰি কৰিছিল হিমাংশুৱে৷ বৰ্তমান হিমাংশুৰ পিতৃ এজন ডাঙৰ দোকানৰ মালিক৷ হিমাংশুৱে যিখন স্কুলত পঢ়াশুনা কৰিছিল সেই স্কুল তেওঁৰ ঘৰৰ পৰা প্ৰায় ৩৫ কিঃমিঃ দূৰত্বত৷

যাতায়াতৰ বাবে ধন খৰচৰ সামৰ্থ্য নথকাৰ বাবে অতি কষ্টেৰে অহা যোৱা কৰিছিল বিদ্যালয়লৈ৷ কেতিয়াবা যদি চাইকেলেৰে কেতিয়াবা কোনো বাহনৰ পাছত ওলমি৷ স্কুলৰ গাণ্ডি তেনেকৈ পাৰ কৰি উচ্চশিক্ষাৰ বাবে দিল্লীলৈ যায় হিমাংশু৷ দিল্লীৰ এখন কলেজৰ পৰা বটানি বা উদ্ভিদবিজ্ঞানত পঢ়াশুনা কৰে৷ কলেজত পঢ়ি থকাৰ সময়ত খৰচ ওলিয়াবলৈ হিমাংশুৱে টিউছনো কৰিছিল৷ অৰ্থৰ বাবে ব্লগ লেখাৰ কামো কৰিছিল হিমাংশুৱে৷ স্নাতক স্তৰৰ পাছত তেওঁ স্নাতকোত্তৰ ডিগ্ৰী অৰ্জনৰো মন মেলে৷ পৰিবেশবিজ্ঞানত তেওঁ স্নাতকোত্তৰ ডিগ্ৰী অৰ্জন কৰে৷ পঢ়া সামৰাৰ লগে লগেই এখন কলেজত চাকৰিৰো প্ৰস্তাৱ লাভ কৰে৷ হাতত ধনৰ অভাৱ যাৰবাবে চাকৰিত যোগদান কৰে হিমাংশুৱে৷ কিন্তু মন কেৱল দেশৰ সৰ্ববৃহৎ পৰীক্ষালৈ৷ দেশৰ অন্যতম কঠিন পৰীক্ষা ইউপিএছচি পাছ কৰি আইএএছ হোৱাৰ সপোন দুচকুত৷

চাকৰিত যোগদান কৰাৰ বাবে কছিঙৰ সময়ো নাছিল হিমাংশুৰ হাতত৷ অৰ্থভাৱ তেতিয়াও শেষ হোৱা নাই৷ সেয়ে হিমাংশুৱে সংসাৰৰ যাৱতীয় খৰচ চাকৰিৰ পৰা ওলিয়াই আজৰি সময়ত কঠিন পৰীক্ষাৰ বাবে গোপনে প্ৰস্তুতি চলাই থাকিল৷ প্ৰথমবাৰ ইউপিএছ়ি পৰীক্ষা দি পাছ কৰিলেও মন পছন্দৰ চাকৰি নাপালে৷ যাৰবাবে ২০১৯ ত আকৌ পৰীক্ষাত অৱতীৰ্ণ হয়৷ ১৮ ৰ পৰীক্ষাত পাছ কৰি তেওঁ ইণ্ডিয়ান ৰেলৱেৰ ট্ৰেফিক চাৰ্ভিছত চাকৰি লাভ কৰিছিল৷ কিন্তু সেই চাকৰি তেওঁৰ পছন্দ নহ’ল৷ হিমাংশুৱে নিজকে আই এ এছ পদতহে দেখিব খোজে৷ আকৌ আৰম্ভ অনুশীলন৷ ২০১৯ৰ পাছত ২০২০ ত আকৌ পৰীক্ষাত বহে৷ ২০ত তেওঁ আই এ এছ পদত চাকৰি লাভ কৰিবলৈ সক্ষম হৈছে৷ হিমাংশুৰ সংগ্ৰামৰ কাহিনী তেওঁ নিজেই এক সাক্ষাৎকাৰত প্ৰকাশ কৰিছে৷ তেওঁৰ জীৱন সংগ্ৰামে আইএএছ হ’ব খোজা বহুজনৰ বাবেই হৈ উঠিছে প্ৰেৰণাৰ উৎস৷

 

Leave a Reply

Your email address will not be published. Required fields are marked *

Leave a Reply

Your email address will not be published. Required fields are marked *