মুখামুখিকৈ গালি পাৰিলেও ভিতৰি মুখ্যমন্ত্ৰী হিমন্ত বিশ্বৰ সৈতে সম্পৰ্ক ভাল! ৯০ দিনৰ পাছতেই সাংসদ হৈ দিল্লীলৈ যোৱাৰ পথ প্ৰশস্থ নেকি আনন্দ মিশ্ৰৰ?

মুখামুখিকৈ গালি পাৰিলেও ভিতৰি মুখ্যমন্ত্ৰী হিমন্ত বিশ্বৰ সৈতে সম্পৰ্ক ভাল! ৯০ দিনৰ পাছতেই সাংসদ হৈ দিল্লীলৈ যোৱাৰ পথ প্ৰশস্থ নেকি আনন্দ মিশ্ৰৰ?

Facebook
Twitter
LinkedIn
Facebook
Twitter
LinkedIn

অসম লাইভ২৪ঃ অসমৰ মৰমে টানিলেও অসম এৰিবলৈ টালি-টোপোলা সাঁজু কৰিছে আনন্দ মিশ্ৰই। অসমত থাকি অসমীয়াৰ প্ৰেমত পৰিলেও মাদাৰলেণ্ড অলৱেইছ বি মাদাৰলেণ্ড। জন্মভুমিৰ প্ৰতি আপোনাৰ মোৰ যেনেদৰে ভালপোৱা আছে এই ভালপোৱা বিহাৰৰ প্ৰতি আছে আনন্দ মিশ্ৰৰো। ছিভিল ছাৰ্ভিছৰ লোভনীয় চাকৰিতকৈ মাতৃভূমিৰ আৱেগ পৃথক। অসম এৰিবলৈ গৈ আৱেগিক আনন্দ মিশ্ৰৰ কথাতেই পোৱা গৈছে কেইবাটাও কথাৰ উমান। ইতিমধ্যে তেওঁ পদত্যাগৰ পত্ৰ প্ৰেৰণ কৰিছে। এছ পি সকলে সংবাদ মাধ্যমৰ আগত মন্তব্য কৰিব নোৱাৰাৰ নিয়ম ভাঙি আনন্দ মিশ্ৰই সকলোকে আৱেগিক কৰি কৰিছে কেইবাটাও মন্তব্য।

আনন্দ মিশ্ৰই ১৮ ডিচেম্বৰত দাখিল কৰা পদত্যাগ পত্ৰক লৈ এতিয়া ৰাজ্যজুৰি হৈ-চৈ লাগিছে। এনেও আৱেগিক বুলি টেগ এটা অসমবাসীয়ে কঢ়িয়াইয়ে থাকে। তেনে সময়তেই অসমত বিগত সময়ছোৱাত খুবেই জনপ্ৰিয় হৈ হিয়াৰ কোণত ঠাই লোৱা বিশেষ ব্যক্তিজন যাবগৈ। এই কথাত আৱেগিক নোহোৱাৰ জানো কিবা প্ৰশ্ন থাকিব পাৰে!

এই চৰ্তহীন পদত্যাগ আঁৰত কি আছে?
লখিমপুৰ জিলাৰ আৰক্ষী অধীক্ষকৰ দায়িত্বভাৰ সামৰি থকা আনন্দ মিশ্ৰই আৰক্ষী সঞ্চালক প্ৰধানলৈ প্ৰেৰণ কৰা পত্ৰত এটা কথা স্পষ্টকৈয়ে লিখিছে যে, তেওঁৰ এই পদত্যাগ চৰ্তহীন। স্বাধীনভাৱে কাম কৰাৰ ইচ্ছাৰে, স্বাধীন জীৱনৰ পৰিকল্পনাৰেই এই পদত্যাগ পত্ৰ প্ৰেৰণ কৰা বুলিও জনাইছে আনন্দ মিশ্ৰই। মাজুলীত সংবাদ মাধ্যমৰ সন্মুখত দিয়া মন্তব্যত আনন্দ মিশ্ৰই বাৰে বাৰে কৈছে, ‘কাম কৰিবলৈ অসমৰ নিচিনা ভাল ঠাই ক’তোৱেই নাই। ইয়াত মোক ইমান মৰম, সন্মান দিছে মই কেতিয়াও পাহৰিব নোৱাৰিম। অসমখন মোৰ সচাঁকেয়ে বৰ মৰমৰ। ভৱিষ্যতৰ কথা কোনেও নাজানে। কিন্তু সমাজৰ বাবে আৰু মোৰ গাঁওখনৰ বাবে কিবা এটা কৰাৰ মানসেৰে মই এই সিদ্ধান্ত গ্ৰহণ কৰিছো। এতিয়া সামাজিক কাম কৰিম ক’লে বহুতেই পলিটিক্স কৰাৰ কথাই ইয়াৰ মাজলৈ টানি আনে। মোৰ মাতৃভূমিত মই আইপিএছ হৈয়ো একো কৰিব পৰা নাই। মই তাৰ পৰা আইপিএছ হ’লেও আজিও মোৰ গাঁৱত স্কুলৰ অভাৱ, খোৱাপানীৰ অভাৱ আদিবোৰ সমস্যা সমাধানৰ বাবে কাম কৰিম। মোৰ সৰু পৰিয়ালটোৰ সৈতে সময় কটাম। এতিয়ালৈকে এয়াই ভাৱি আছো!

উল্লেখ্য যে, অসমত আৰু মাত্ৰ ২০দিন থাকিব আনন্দ মিশ্ৰ। কেইবাবছৰ ধৰি অসমৰ ধুবুৰী, নগাওঁ তাৰপিছত লখিমপুৰত সেৱা আগবঢ়োৱা আনন্দ মিশ্ৰই নিজৰ কামৰ মাজেৰে অসমত অভূতপূৰ্ব সমাদৰ লাভ কৰিবলৈ সক্ষম হৈছে। অসমৰ লোকেও তেওঁৰ কামৰ বিনিময়ত দিয়া আন্তৰিকতা মৰমৰ কথাবোৰ সোঁৱৰি বিদায় পৰত অসমক লৈ যথেষ্ট আৱেগিকো হৈ পৰিছে আনন্দ মিশ্ৰ। ২৭ ডিচেম্বৰত মাজুলীত মোহন ভাগৱতো আহিছে। মোহন ভাগৱত অহাৰ পৰতেই তেওঁক মাজুলিত দেখি একাংশই ৰাজনৈতিক অংক থকাৰ কথাটোতো প্ৰায় নিশ্চিত হৈ পৰিছে।

আনন্দ মিশ্ৰক ৰাজনীতিলৈ অনা মানুহজন হিমন্ত বিশ্ব শৰ্মা!

বৰ্তমান অসমত থকা আৰ এছ এছ প্ৰধান মোহন ভাগৱতক ২৮ ডিচেম্বৰত সাক্ষাৎ কৰিব আনন্দ মিশ্ৰই। ইতিমধ্যে সাক্ষাতৰ বাবে সময় দিছে মোহন ভাগৱতেও। মুঠৰ ওপৰত প্ৰশাসনিক সেৱাৰ পাছত এইবাৰ ৰাজনীতিতো অতি সুপৰিকল্পিতভাৱে খোজ দিব বিচৰা আনন্দ মিশ্ৰক ৰাজনৈতিক ক্ষেত্ৰলৈ অনাৰ বাবে সকলো পৰিকল্পনাৰ আঁৰত বহুতেই মুখ্যমন্ত্ৰী হিমন্ত বিশ্ব শৰ্মাৰ হাত থকাৰ কথাও চৰ্চা চলাইছে।

দেশৰ ৰাজনীতিত আমূল পৰিৱৰ্তন আনিবলৈ আনন্দ মিশ্ৰ বিজেপিলৈ গমন কৰাটো প্ৰায় ১০০শতাংশ নিশ্চিত হৈছে। সামাজিক আৰু ব্যক্তিগত কামবোৰ স্বাধীনচিতীয়াকৈ আগবঢ়াই নিয়াৰ উদ্দেশ্যৰে প্ৰশাসনিক সেৱাৰ চাকৰিৰ পৰা অব্যাহতি বিচৰা আনন্দ মিশ্ৰই বিহাৰৰ বক্সাৰ লোকসভা সমষ্টিৰ পৰা টিকট লাভ কৰাটোও প্ৰায় নিশ্চিত হৈছে। পিছে ২০২৪ৰ ১৬জানুৱাৰীত চাকৰিৰ পৰা অব্যাহতি বিচৰা আনন্দ মিশ্ৰই কেতিয়া বিজেপিত যোগদান কৰিব? আনন্দ মিশ্ৰই শেহতীয়াকৈ জনোৱামতে, চাকৰিৰ পৰা অব্যাহতি লোৱাৰ পাছতে পিছৰ কাৰ্যপন্থা গ্ৰহণ কৰা হ’ব।

একাংশ সূত্ৰই প্ৰকাশ কৰামতে, বহুদিনৰে পৰাই আনন্দ মিশ্ৰই বিজেপিৰ ৰাষ্ট্ৰীয় শীৰ্ষ নেতৃত্বৰ সৈতে যোগাযোগত আছে। দিল্লীত একাধিকবাৰ বিজেপিৰ নেতৃত্বৰ সৈতে আলোচনাত মিলিত হৈছে আনন্দ মিশ্ৰ। এসপ্তাহৰ আগতেও দিল্লীত বহুকেইদিন বাহৰ পাতি আছিল আনন্দ মিশ্ৰই। আনন্দ মিশ্ৰৰ নতুন ৰাজনৈতিক যাত্ৰাত সহায় কৰিছে অসমৰ মুখ্যমন্ত্ৰী হিমন্ত বিশ্ব শৰ্মাইও। দুৰ্গা পূজাৰ পাছতে হিমন্ত বিশ্ব শৰ্মাক লগ ধৰি আনন্দ মিশ্ৰই ৰাজনৈতিক যাত্ৰাৰ সন্দৰ্ভত অৱগত কৰিছিল বুলিও সূত্ৰটোৱে প্ৰকাশ কৰিছে।

আনন্দ মিশ্ৰৰ কথা কেন্দ্ৰীয় গৃহমন্ত্ৰী অমিত শ্বাহকো কৈছিল অসমৰ মুখ্যমন্ত্ৰী ড০ শৰ্মাই। আনন্দ মিশ্ৰৰ ভাল ফীডবেক আছে বুলি অমিত শ্বাহক জনোৱাৰ লগতে সমাজৰ হিতৰ বাবে কাম কৰাৰ প্ৰৱল ইচ্ছা আছে বুলিও কৈছিল। আনন্দ মিশ্ৰই বিজেপিৰ গমনৰ সন্দৰ্ভত এতিয়ালৈকে কোনো কথাই প্ৰকাশ কৰা নাই যদিও সাংবাদিকে সোধা প্ৰশ্নত পোনপটীয়াকৈ না বুলিও কোৱা নাই।

আনন্দ মিশ্ৰই নিৰ্বাচন খেলিব লগা বক্সাৰ লোকসভা সমষ্টিটো বৰ্তমান বিজেপিৰ দখলতে আছে। কেন্দ্ৰীয় মন্ত্ৰী অশ্বিনী চুবে সাংসদ হৈ থকা সমষ্টিটোত ইতিমধ্যে আওপকীয়াকৈ প্ৰচাৰ আৰম্ভ কৰিছে আনন্দ মিশ্ৰই। ২০১৪ আৰু ২০১৯ৰ লোকসভা নিৰ্বাচনত বহু ভোটৰ ব্যৱধানত জয়ী হৈছিল অশ্বিনী চুবে। ১৯৯৬চনৰ পৰা ধাৰাবাহিকভাৱে এই সমষ্টিটোত বিজেপিয়ে দখলত ৰাখিছিল যদিও ২০০৯চনত আৰ জে ডিৰ জগতানন্দ সিং সমষ্টিটোত জয়ী হৈছিল। তাৰ পাছতে পুনৰ দুবাৰকৈ এই সমষ্টিটোত অশ্বিনী চুবে সাংসদ হিচাপে নিৰ্বাচিত হৈছিল। আগন্তুক ২০ দিনত অসম ত্যাগ কৰিব পৰা আনন্দ মিশ্ৰৰ হাতত নিৰ্বাচনলৈকে হাতত আছে মাত্ৰ ৯০ দিন। এই ৯০ দিনত প্ৰচাৰ চলাই বক্সাৰ সমষ্টিটোৰ পৰাই ২০২৪ত নিৰ্বাচন খেলাৰ মন মেলিছে আই পি এছ আনন্দ মিশ্ৰই।

Leave a Reply

Your email address will not be published. Required fields are marked *

Leave a Reply

Your email address will not be published. Required fields are marked *